قصيدة البيبسي
فالح الدهمان
روعة
حرام ياشيـخ لـو تقرالـى الكرسـى= من طلعة الشمس لين الليـل يدمسهـا
ماشفت بى جن لكنـه مـرض نفسـى=العشق حالـه ولاعـن جـد خامسهـا
هـواى عفريّتـن وعيونهـا الخرسـى=ماشفتهـا لكـن أهـواهـا وأقدّسـهـا
حين اهمست لى بكلمه رحت من أمسى=واليوم روحى رهينـه فـى محابسهـا
كنى بحبسـى وكنـى مانـى بحبسـى=مسجون مطلـوق ماخـوذ بوساوسهـا
ان هب ريح الجنوب اهب له عكسـى=واليا اعتلت نجمـة الجـوزا أجالسهـا
والبعـد قتّـال يابعـدى ويـا حمسـى=كـذا أغنـى ونـار النـار مونسـهـا
ليت المدامع دمى ليت الحشا ضرسـى=ماكان كبدى لهيـب الشـوق حامسهـا
لا العين تصبح ولا هى بالمسا تمسـى=متخالفن مع عيـون الخلـق حارسهـا
والله ما أشرقت والا أغربت شمسـى=الا وأنـا عبرتـى عبـرات حابسهـا
هو فيه بالناس من لونى ومن جنسـى=ياشيـخ فـى حسهـا والا هواجسهـا
مانى بمجنـون ذا عشقـى وذا حسـى=والمعرفـه علمهـا عنـدى وأدرّسهـا
فرّاس أقرا عيـون النـاس وبحدسـى=أقلّـب قلوبهـا واكشـف دسايسـهـا
قليل صادفت مثلى مـن بنـى انسـى=وعقول ماينتمى لـك فكرهـا سسهـا
خاويت حيوانها فـى العالـم المنسـى=والجـن ماشفتهـا لـولاى حاسسهـا
أيام صلّت وراى فروضـى الخمسـى=والطيـر والـداب والنمـل بمتارسهـا
كم ليلتن موترى فـى ليلـى الدمسـى=على دروب السفـر نجـم بخرامسهـا
مريت فيه بمضـارب عنتـر العبسـى=حتـى تعديتهـا لـديـار بطرسـهـا
ومنين مارحت حنـا فـى نيوجرسـى=الآرض صـارت مساجدهـا كنايسهـا
نذوق مـر الزمـان بعلبـة البيبسـى=ونعيش عصر الهزيمه فـى ملابسهـا
ساءلـك ياشيـخ بالعبـاس والمرسـى=انك اتغنى معى واليـا سهيـت اسهـا